මගේ ආදරණීය තාත්තා
අද ඔක්තෝබර් 05 වෙනිදා.
තාත්තාගේ උපන් දිනය.
ඈත දුරු රටක ඉඳන් උදේ පාන්දරම තාත්තාට සුභ පැතුවට හිතට හරි නැහැ.
අද දවසේ වත් එතුමා ළඟ ඉන්න තිබුණා කියා හිතුනා.
පොරොන්දුව සහ ප්රාර්ථනය ලබන අවුරුද්දේ තාත්තාගේ උපන් දිනය දා එතුමා එක්කම ගත කරන්නයි.
අනිත් තාත්තලා වගේ ජීවිතේ කිසිම දවසක අපේ තාත්තා උපන් දින උත්සව පවත්වනවා අපි දැකලා නැහැ.
තාත්තා කිසිදාක මත්පැන්, සිගරට් නොබීපු හින්දා, මස් මාංශ අනුභවයෙන් තොර හින්දා අපේ ගෙදර කන බොන පාටි කවදාවත් තිබිලා නැහැ.
තාත්තා කිසිදාක මත්පැන්, සිගරට් නොබීපු හින්දා, මස් මාංශ අනුභවයෙන් තොර හින්දා අපේ ගෙදර කන බොන පාටි කවදාවත් තිබිලා නැහැ.
ඒ නිසා එතුමාගෙ හැම උපන් දිනයක් ම ගෙවිල ගියේ සාමාන්ය දවසක් විදිහටම තමයි.
අම්මා උදේ රැයින් උයන කිරිබතින්, පන්සලට දවලට දෙන සාංඝික දානයෙන් ඒ හැම උපන් දිනයක්ම සරලව ගෙවුනා.
අපේ තාත්තා හරිම සුන්දර අපූරු මනුස්සයෙක්. මගේ පුංචි කාලේ එතුමාගේ යාළු මිත්රයෝ මගේ ලෝකෙත් වීරයින් වෙලා හිටියා.
කරුණාරත්න අබේසේකරයන්, මට අත් පොත් තැබූ සිරිල් ඒ. සීලවිමලයන්, මිල්ටන් පෙරේරා, ධර්මදාස වල්පොල, එච්. ආර්. ජෝතිපාල, හරූන් ලන්ත්රා, සුමිත් අහංගම, ක්රිස්ටි ලෙනාඩ් පෙරේරා, ෂෙල්ටන් ප්රේමරත්න, ඇලෝයි ගුණවර්ධන, ත්යාගා එන්. එඩ්වඩ් ආදී එදවස කලා කෙත පෝෂණය කළ දැවැන්තයින් සමඟ එතුමා තිබූ සමීප ඇසුර පුංචි මට ගෙන දුන්නේ විචිත්ර අත්දැකීම් රැසක්.
මිල්ටන් අංකල්ගේ, වල්පොල අංකල් ගේ ගීත නිතරම මිමිණූ තාත්තාට තිබුණේ හරිම මධුර කටහඬක්. එතුමා නිසාමයි මමත් මිල්ටන් අංකල් ගේ ගී වලටම ප්රිය කළේත්.
මිල්ටන් අංකල් සහ ප්රියංකරගේ මෑණියන් මාලා ඇන්ටී එක්ක පාසලේ එකම පන්තියක අකුරු කළ මගේ අම්මයි තාත්තා දෙන්නාත් ජීවිතේ එකට ඉන්න සපථ කරගත් කතා පුවතත් අහගෙන ඉන්න කොට හරිම ආදරණීයයි.
ජීවිතේ කිසිදාක මට වත් නංගිලා දෙන්නාට වත් නියපිටින් පහරක් ගහල නැති අපේ තාත්තා අසල්වැසියෙකුට ඇහෙන්න කවදාක වත් ශබ්ද නගලා කතා කරලා නැහැ.
මේ සොඳුරු ගති ගුණ තාත්තාගෙන් දරුවන් වූ අපි කාටත් පිහිටලා නැහැ.
මේ සොඳුරු ගති ගුණ තාත්තාගෙන් දරුවන් වූ අපි කාටත් පිහිටලා නැහැ.
මම හැම දාම ප්රාර්ථනා කළේ තාත්තා වාගේ වෙන්න.
ඒ වුනත් මට තාම බැරි වුනෙත් ඒ දේ කර ගන්නම තමයි.
හිතට ගොඩක් කණගාටුවක් දැනෙනවා තාත්තාගේ එකම පුතාට තාත්තා වගේ අහිංසක සොඳුරු මිනිසෙක් වෙන්න බැරි වීම ගැන.
රටක් රාජ්යයක් තරම් වටින මගේ තාත්තා වෙනුවෙන් ලියූ මේ කෙටි සටහන අවසන් කරන්නේ තාත්තා වෙනුවෙන් මා ලියූ, ජගත් වික්රමසිංහ තනු නිර්මාණය කළ තුෂාර කුරුවිටගේ සංගීත අධ්යකෂණය කළ මේ ගීතය රසවිඳින්න එකතු වෙන්න කියා ඔබට ආරාධනය කරමින්.
පසුගියදා අපි පටිගත කළ සහරාවේ තරු වැඩසටහනේ ප්රචාරය කරන්නට ඉතා කෙටි කාලාන්තරයක් තුළ අපි මේ ගීතය පට්ගත කොට රූප රචනා කළා.
පහත දක්වා තිබෙන ගීතයේ යූ ටියුබ් ලින්කුව ක්ලික් කොට ගීතය රස විඳින්න. ඔබේ අදහස් අපට ලියා එවන්න.
http://www.youtube.com/watch?v=ZBN_mm7s19w&feature=plcp
මේ ගීතය මගේ තාත්තාට පමණක් නෙවී. ඔබෙ ආදරණීය තාත්තාට වගේම, මේ ලෝකේ ඉන්න සුවහසක් තාත්තලා වෙනුවෙනුයි.
ඔබට ආදරණීය හෙට දවසක්...!
ආදරයත් සමඟ,
සුදේශ් කරුණාතිලක ~
